今次埃及之旅可以話係一個幾Hae o既旅行，行程完全係唔急 ! 係搭飛機同埋轉機比較耐Ｄ，其餘一齊都OK。不過基本上住宿唔係想像中咁，係洪加達間酒店我地住係間酒店o既員工宿舍(唔知係唔係，不過都有成八成似)隔離，重要離酒店o既Main Building成10分鐘路程 ! 我地叫做好啦 ! 其他團友住係地下重有蠍子同埋一Ｄ小昆蟲添呀。係洪加達玩浮潛真係幾正，Ｄ水真係清到你會”嘩”一聲，不過我地去浮潛o既地方就唔係咁多珊瑚同埋魚睇 ! 而係尼羅河架遊船都係覺得無其他咁正，比較殘舊 ! 不過基本上都叫可以o既，係食方面係酒店就多選擇Ｄ，不過都係個幾樣同埋埃及人o既煮野食無中國人咁正，可能近西方人口味呱 ! 係船上面就一餐好過一餐….最難食o既一餐就係係火車上面o既晚餐，嘩~~~我都叫做咩都食得落口，都覺得唔掂，可想而之就真係唔係好得。講到去過埃及有咩感受呢 ? 我諗首先要知道埃及一Ｄ歷史先知道睇緊o既地方同埋個樣野有咩背景，雖然導遊都會講解返俾你知，但係自己知道會好Ｄ ! 睇過咁多個建築物，會覺得古埃及人真係好勁，一路睇一路諗係點起o既呢 ? 係點整出來o既呢 ? 就算係現今o既技術都要有好多o既機械幫助先可以做到，係個個時間淨係得人力，點樣可以做到o既呢 ? 有時會諗，佢地其中有Ｄ埃及人其實係咪外星人，定係有Ｄ未來人用時光機返去古代因為某Ｄ原因滯留o左係古埃及呢 ? 好多疑問…..不過點解現今o既埃及人會咁落後o既呢 ? 可能真係打仗問題導致到埃及咁樣，四大文明古國，淨返三個，埃及都算係最落後一個 ! 埃及一生人至少要遊一次，今次我地都係去o左Ｄ熱門景點參觀~~~先前係網上面見到有人去一個黑白沙漠都幾正，重有亞歷山大港都無去到 ! 有機會再去的話，真係要去睇睇啦 ! 重有一樣就係埃及人唔知點解好鍾意問人囉 Tips 同埋好鍾意呃人錢，如果唔係先前有睇Ｄ資料，可能會俾佢地呃o左都唔定。希望係若干年後，埃及o既旅遊攪好Ｄ，埃及人無咁欺騙人，入去Ｄ景點有得影相就好啦 !!!
2008年2月11日
2007 埃及之旅第八及九天
2 Nov 2007
開羅 Cario —> 梯形金字塔 Step Pyramid —> 金字塔 Pyramid、獅身人面像 Sphinx —> 杜拜 Dubai —> 香港 Hong Kong
今日係埃及之旅最後一日行程，不過尋晚係火車都唔係訓得幾好，因為架火車不停咁開，同埋張被又有陣煙味，所以都訓得幾辛苦。跟住個服務員晨早就叫醒我地，好短時間就敲門話要收床，攪到我地滾水漉腳咁 ! 火車o既早餐就係全部麵包加杯熱飲，不過我地都叫個服務員幫我地漉o左兩個杯麵，如果唔係就唔夠食喇。來o左埃及咁多日，好耐無食過麵啦，所以呢杯麵非常之好味。食完個早餐之後就等落車去睇第一個景點，梯形金字塔喇，呢個金字塔係位於吉薩 (Giza) ，可能時間尚早，我地去到o既時候得我地Ｄ人係到，後來都有一、兩個外國遊客出現。入到去睇個金字塔o既時候都係要由當地導遊講解，不過係個到有好多狗係到，不停咁向Ｄ遊客擺尾想囉野食 ! 呢個梯形金字塔係Ｄ大型金字塔o既初期品，後來Ｄ金字塔都係又呢種梯形金字塔演變出來 ! 睇完梯形金字塔，就要去睇個大o既金字塔同埋獅身人面像喇。我地去到o既時間都人頭湧湧，重要係加上係當地o既假期(係呀，星期五係當地o既假期)，好多當地人同埋學生係個到出現 ! 去到睇最大個金字塔附近o既時候，個金字塔真係好大，Ｄ古代埃及人係點起o既呢 ???? 真係好勁 ! 睇完我地就可以入去睇第二個大o既金字塔，成團人得我地兩個入到最後個墓室，好多團友去到一半就話頂唔順，因為入面真係有一陣味，就係臭汗味，同埋入面Ｄ通風唔係咁好，所以都幾辛苦，因為入去條通道都幾窄下。入去前，見到幾個好似係日本o既上年齡女士行出來o既時候，成個頭都係汗 ! 入到去個墓室o既時候，得幾個人係到。裡面其實無咩野，得一幅石棺材開o左係到。同埋重有幾個外國人，佢地又影相又訓落個棺材到，真係……睇完我地就極速行返出來。跟住我地就係去騎駱駝喇，不過我地無騎到，因為當時都幾晒下，同埋先前又騎過，而個到Ｄ駱駝都幾臭，個個位置可以遠距離睇晒3個金字塔，同埋附近都又幾多攤檔賣Ｄ擺設品，不過我地無咩興趣，影完相就行o左一陣就上車喇。睇完金字塔就係去睇獅身人面像，路程好近下，不過可能時間唔早，有好多人係到，睇o既時候都係迫迫下…..睇完晒所有o既景點，基本都已經係完成晒呢個埃及之旅o既行程。先前係網上面睇過有人話金字塔附近有一檔賣芒果汁好正o既，但係去到o既時候就裝修緊，無得試添 ! 咁之後就係去食 Lunch ，呢一餐都幾好味，有一個烤爐燒住Ｄ牛肉同雞肉，都幾正。呢到重有得叫芒果汁添，味道都幾正架!食完 Lunch ，有好多時間淨，領隊就問我地去唔去睇下Ｄ香薰店，我地基本上都無咩問卷調查，去到都係一般售賣模式，有個人講解下，之後就俾Ｄ Discount 呀、送Ｄ贈品咁俾我地。最後我地都買o左三支香薰精華油，因為佢Ｄ香薰油真係幾正下，同埋Ｄ價錢真係幾抵，買呢幾支香薰重有幾個幾靚o既香薰油樽送添啊….不過有一個係返到來香港就爛o左 ! 睇完香薰店，就去睇呢個紙沙草，紙沙草係埃及古代好常用o既野，當場就試o左點將Ｄ紙沙草變成一張紙…不過我地無人買 ! 跟住就係去機場回程返香港喇，係去機場途中旅行社就送o左每人一張有自己個名寫o左係張紙沙草上面俾每個團友留念，都幾靚，不過我個張佢地就寫錯名。之後就搭飛機去杜拜再轉機返香港，返到香港都成下午六點幾喇 !
—->相簿
2007 埃及之旅第七天
1 Nov 2007
亞斯旺 Aswan —> 阿布辛貝神殿 Abu Simbul Temple —> 亞斯旺大水霸 Aswan High Dam —> 未完成方尖石碑 Unfinished Obelisk —> 開羅 Cario (通霄火車 Overnight Train)
住宿 : 火車軟臥
今日要晨咁早就起身出發去睇阿布辛貝神殿，2:30 a.m. 就要集合，早餐就係全飽宴。架車有係駛到去一個地方等齊所有要去阿布辛貝神殿o既遊客，一次過出發。開車無耐就訓o左，大約兩個鐘後就醒o左，個天光緊但係個太陽就未升起，於是乎就等睇個太陽升起啦。跟住未夠七點就去到目的地喇，去到o既時候又係有一大班遊客一齊，不過好在時間尚早，太陽就唔係好晒。入到去又係由當地導遊講解下個神殿o既來由，同埋點解會係到出現，個神殿原先個位置係係現在個湖附近，因為埃及政府要起亞斯旺大水霸，而聯合國知道起完個水霸之後，個神殿就會被淹沒，所以就將個神殿上移200公尺喇 ! 呢個神殿又係唔可以係入面影相，但係我地睇o既途中見都一個外國人不停咁係到影，呢個神殿無咩特別，我諗特別在點解聯合國會用成四億元將佢移動….睇完晒就搭返3個鐘頭車出去睇亞斯旺大水霸喇。呢個亞斯旺大水霸其實就無咩特別，普通水霸一個，不過就加建埋Ｄ水力發電o既設備。睇完亞斯旺大水霸我地就要去睇未完成方尖石碑，話說呢個方尖石碑係Hatshepsut女皇要Ｄ工人係一個月之內完成一支當時全埃及最高o既方尖石碑，但係可能時間就少同埋趕工關係，係製造方尖石碑o既過程中出現o左一條不能修補o既裂痕，所以就唯有放棄呢條石碑喇。去到睇下呢條方尖石碑時，太陽都已經高高掛起，好晒 ! 大家睇完就立刻走人去Ｄ無太陽晒到o既地方到休息 ! 跟住就打道回船，領隊話安排我地沖個涼先然後係船到食個Lunch後就再去坐 Felucca。於是乎我地返到船就啦啦淋沖涼執野 ，點知沖沖下就話食得Lunch，再過多10分鐘就話要走，俾原定時間早o左成十幾分鐘，令到我地失o左預算。之後就滾水漉腳咁走人，跟住就車o左一個岸邊搭Ｄ水上的士去到一間湖邊餐廳，呢個Lunch都唔錯 ! 食完Lunch就去坐 Felucca 啦，係坐o既途中個埃及人都不忙係架船到擺檔賣野，不過Ｄ貨品唔係好得，我地無人幫襯。話就話會坐30分鐘，但係都係坐o左大約15分鐘就坐完。坐完船就驅車去火車站喇，去到火車站，因為時間尚早，領隊就話可以自己活動，但係個火車站附近基本上就無野好睇，成2個幾鐘都唔知做咩好，我地同幾個團友行o左附近o既市集一陣就搵o左間Pizza 店坐下，但係其實就唔肚餓，志在有個地方坐下。不過呢間Pizza店Ｄ Pizza 都幾好味，重要唔係好貴 ! 亞領隊話會請我地食返個 Pizza 我地諗佢可能係呢間到買都唔定，因為附近都唔見有其他 Pizza 店。之後就上火車，我地一團人全部係晒一卡車到，個車箱都唔係好大，基本上開o左張床係開唔到個行李箱。上火車無耐就派晚餐，領隊真係一人買o左個 Pizza 俾我地，不過好飽下，同埋火車個晚餐真係唔係好得，Ｄ飯一粒粒，Ｄ餸就硬班班…一Ｄ味都無，失敗之中o既失敗，好在有個Pizza同埋唔係好肚餓，所以就無咩問題，如果好餓就o賴野 ! 係間房入面係咁以抹下個身，之後就訓覺喇….
—->相簿
2007 埃及之旅第六天
31 Oct 2007
恩斯納 Esna —> 依芙神殿 Edfu Temple —> 金安寶神殿 Kom Ombo (荷力斯神殿 Horus Temple & 鱷魚神索貝克神殿 Sobek Temple) —> Aswan 亞斯旺
住宿 : M/S Princess Amira
今日有兩個行程，分上下午進行，第一個就係去依芙神殿，而去呢個神殿o既交通工具就係馬車。一上到岸，當地導遊就安排o左一架馬車俾我地，個司機開頭都無出聲，當行o左幾分鐘路程o既時候，佢就介紹隻馬叫咩名，自己又叫咩名，跟住就話自己架馬車係法拉利。跟住就逢車過車，有馬車阻住就係咁鬧，但係行行下就突然停低架車話幫我地影相，一個唔記得埃及人幫人做完野就要囉錢，果然真係…影完就話要錢，我地梗係睬佢傻啦 ! 話叫佢問領隊囉….最後都到o左神殿，但係佢都係死心不息，係咁話要….我地就落車唔理佢，點知佢都重話一陣俾。之後集合晒就入去神殿參觀，係集合o既地方都幾大塵同埋都幾臭，因為有好多馬屎係到，重有都有不少遊客出現o左。入到神殿就見到一個好大o既建築物，好似一個城們咁，左右o既雕刻都係一樣….好對稱，又一個問題出現，點解可以係Ｄ咁高o既建築物到做到Ｄ咁o既野o既….????? 之後就睇下入面Ｄ野，重有就係要睇一架船，不過個到就多人到水洩不通 ! 嘩，真係要迫埋去先睇到個隻船，睇完就啦啦淋走人，因為真係好迫…..之後領隊唔知去o左邊，我地就係出面影下相睇下野，睇睇下個領隊搵我地，原來重有個大壁畫要睇，睇完個大壁畫，就自由活動，我地就週圍影下相，然後就走，因為好多人同埋開始晒。出到神殿出面，有一大排o既商舖係到，我地係咁兒行下，見Ｄ野無咩興趣，行到最後o既時間見到個地圖就問下幾多錢，個埃及人開價30埃鎊，因為我地先前買個一個都係10埃鎊，我地就還價5埃鎊。跟住個埃及人就扮到好慘，賣俾我地會洩錢，我地睬佢都傻，5埃鎊唔賣我地就走，一轉身走就話5埃鎊賣俾我地。根住就俾錢囉o左個地圖就走，點知個埃及人話唔夠，我地唔理佢走人，因為又唔洗找錢個地圖又係我地到….嘻嘻。之後，就去集合地方，想叫領隊換架馬車俾我地，費時個馬車司機又問囉錢。等o左好耐都無車，個當地導遊就打電話唔知俾邊個，好似係到鬧交咁。後來找搵到一架，有兩個團友就上車返船個邊，跟住無神神有個馬車司機唔知做咩發老皮，係到掉野大致係唔開車…..跟住個領隊就叫我地上車，又係坐返個架，個司機開到中途又問囉錢，我地就話問領隊，原途一有機會佢就問，我地都無俾佢。就來去到上船o既地方o既時候，突然同架車撞o左一撞，好在沖力唔大無咩事。但係我地都覺得無咩野，後來聽到Ｄ團友講見到撞車，原來係講我地個架…..去到落船o既地方我地就落車，最後都無俾錢佢，但係佢都係咁問，不過因為慌忙咁落車，點知留低o左把傘係架車到，後來上o左船先知，同領隊講留o左把傘係架馬車到，因為傘係埃及真係幾有用，用來遮太陽….亞埃及助遊即刻上岸睇睇，但係因為要開船，所以最後都係搵唔到 !! 跟住返到入房，一開門就見到一隻野掛o左係天花板到，原來係Ｄ埃及人用毛巾摺o既公仔，重用Ｄ膠袋整o左Ｄ眼、耳、口鼻添….之前領隊都有同我地講會有Ｄ咁o既野架啦…其他團友重有鱷魚同埋鶴添呀…..
睇船到食完個Lunch就休息下等去下午o既景點金安寶神殿喇 ! 出發時間係下午四點，個太陽都開始落山。去到個神殿o既視時候，都有幾多遊客，但係就唔係太迫。首先我地就睇o左個鱷魚木乃伊先，條鱷魚木乃伊放o左係一間幾細下o既屋仔入面，要排隊入去睇，條鱷魚無係開羅博物館入面見到個Ｄ咁大條。睇完條鱷魚就入去神殿到睇野喇，聽導遊講埃及未整尼羅河條大水霸o既時候，成日都會水沉，而呢個神殿都會被水沉到，所以尼羅河泛濫時都幾勁，個神殿入面o既建築都係同一般神殿差不多，但係入面其中一塊壁畫就記載o左有365日為1年o既野，重講o左咩時間要種Ｄ咩同埋做Ｄ咩，又有個問題出現，佢地Ｄ文化係個時真係幾勁，但係點解會忽然間咁落後o既呢 ? 不過係睇呢個壁畫中，其中一個當地導遊唔排隊係咁行埋來就講解比佢帶緊o既遊客，我地o既領隊就話我地先，好似有Ｄ火藥味咁。講完就去睇下一幅壁畫，就係記載o左遠古o既埃及人已經有好似手術刀呢一樣o既野出現 ! 之後就睇下一個古井後就自由活動喇。跟住我地就影下相，四圍行下，睇到其中一幅壁畫入面畫o既野好似外星人咁。睇完個神殿領隊見有Ｄ時間淨就話可以係附近Ｄ商舖都睇下野，我地就睇下有無咩o岩心水，不過最後都後無野o岩。行行撞到當地旅遊助理亞慕罕麥德，跟住就一齊行，行行下佢突然送o左條聖甲蟲手帶俾老婆，因為佢知道今日係佢生日，所以就送樣禮物俾佢喇…都幾驚喜 ! 之後就上船食埋個晚餐，今晚晚餐Ｄ野好食好多喎，唔知係唔係正式o既廚師返o左來呢 ?!! 食完晚餐個領隊就話今晚船到有個阿拉伯之夜，唔怪得之見到好多外國人身穿一Ｄ阿拉伯o既服裝，不過最後我地到無去，因為訓著o左….日頭晒完真係好易訓著，重有就係聽日重要早起身，因為要去睇阿布辛貝神殿 Abu Simbul Temple ，又係軍警開路，零晨3點出發…..
—->相簿
2007 埃及之旅第五天
30 Oct 2007
尼羅河遊船悠閒的一天
住宿 : M/S Princess Amira
今日係無行程o既一日，朝早食完早餐之後就係舺板到Hae、睇下岸邊Ｄ風景。而架船就一路係尼羅河到行駛，行行下去到有個大水閘o既地方停o左，原來要排隊等過大水閘，跟住就見到好多埃及人拐架艇過來賣Ｄ衫、檯布之類o既野。點賣呢，佢地會用個袋包住Ｄ野拋上架船到，係拋上來，過程好鬼過癮。開頭淨係得Ｄ外國人買，我地同埋Ｄ團友就係到睇，後來我地有Ｄ團友又睇埋一份，攪攪下有成三、四架艇埋o左來，係咁拋Ｄ野上來。佢地賣Ｄ野開個價開頭好鬼死貴，我地要不斷還價，好在係網上面睇過知道佢地會開天剎價，我地還價，佢地重要表情多多，扮到好似好慘，泄晒底咁。睇睇下睇o岩o左條絲巾，梗係講下價先啦。開頭佢地要100埃鎊，我地開10埃鎊，跟住佢地就話唔得，扮到好慘….我地就15…20兩條…咁講…之後佢都係話唔得…我地咪掉返落去俾佢囉，一掉佢地就話得，咁就成交o左，過程都幾好玩，掉來掉去。其他團友都買o左唔少野，買完野都差不多到食飯時間。於是乎就去食返個Lunch，食完lunch係房到Hae o左一陣，跟住係睇架船過水霸。見有Ｄ時間，就上o左岸係岸邊一間舖頭到睇野，係間舖頭到買o左Ｄ書籤同埋一幅尼羅河旅遊地圖，重食o左支雪條添…..正。之後都唔敢行咁遠，費時返唔到船就大鑊….跟住又係返房到休息等食晚飯，點知訓o左一陣….到o左食飯時間就上返去間餐廳到，不過就多o左好多外國人係到，應該係頭先泊岸時先上船，今晚o既晚餐都係無咩驚喜，普普通通咁，點知我地食完想走o既時間，見到個侍應揸住個類似蛋糕o既物體差不多繞場一週，俾每一檯o既旅客都睇一睇，又唔知講Ｄ咩，最後行到我地就放低o左…原來係領隊為我地慶祝生日，真係一個大驚喜…嘻嘻..個蛋糕雖然甜o左Ｄ，但係都幾好味。食完個蛋糕就返房訓喇….咁就渡過o左一個愉快o既生日喇…
—->相簿
2007 埃及之旅第四天
29 Oct 2007
洪加達 Hurghada (軍警開路) —> 樂蜀 Luxor —> 恩斯納 Esna —> 喀納克神殿 Karnak Temple —> 帝王谷 Valley of Kings —> 女皇神殿 Hatshepsut Temple —> 萬農神殿 Colossi of Memnon —> 樂蜀神殿 Luxor Temple
住宿 : M/S Princess Amira
今日要一早就起身，因為要由洪加達去樂蜀，途中要經過沙漠高速公路，所以要軍警開路。我地要係8:00係一個地方集合，然後一軍警就會浩浩蕩蕩咁帶住成隊人駛去目的地。去到集合o既地方都已經有幾十部大細旅遊車係到排隊準備出發，到o左出發時都有成起碼五、六十部車到…..之後去到第一景點 – 喀納克神殿(Karnak Temple http://www.eyelid.co.uk/karnak1.htm, http://en.wikipedia.org/wiki/Karnak)
都成十一點，陽光開始好猛烈。入面Ｄ建築有好大部份都已經係爛o左，但係都睇到埃及當時建築係….點解可以起到Ｄ咁o既o野o既???重有就係每個建築物上面Ｄ雕刻都好細緻，重要係好對稱，埃及古代唔通真係有外星人 !!! 睇完呢個神殿之後就係上尼羅河遊船，隻船其實都唔係靚仔，因為睇到地個Ｄ都幾正下….今次係住係四樓，但係就係船尾，如果架船係開住的話都幾噪同埋都會有Ｄ死氣味添架….安頓好Ｄ行李就係船入面到食 Lunch ，入面Ｄ野食可以講句，食得飽唔會餓囉 !
食完午餐，係船到四圍睇下，然後休息下又去另外一個景點，帝王谷。呢到有不少o既埃及法老王o既墓穴，但係公開俾公眾人士參觀o既唔係有好多個，重有就係跟團的話通常都係會帶你睇幾個比較出名，不過其實入面無咩野睇，主要o既野都搬晒去埃及博物館入面，所以係無野睇o既 ! 呢個時間係呢Ｄ咁空曠o既地方睇野都唔好話唔晒，所以睇兩睇就走，重要入面又唔比人影相，所以睇完就算喇。
睇完帝王谷，然後就去女皇神殿，呢個女皇哈特謝普蘇特(Hatshepsut)係埃及唯一一個女o既法老王，其實係佢死o左之後，新上位o既法老王係唔想後世人知道有一個咁o既女法老王，所以有關佢o既野好多都被破壞，但係唔知咩原因，呢個神殿就遺留o左落來 ! 呢個神殿入面Ｄ建築比起其他o既就比較簡單，不過入面就出現o左Ｄ牛神o既壁畫，其餘都係無咩大特別。
跟住另外一個景點就係去樂蜀神殿 (Luxor Temple)，呢次我地搭o左Ｄ埃及水上的士過對面岸o既神殿，去到都成五點幾，不過個天到黑晒，重有就係好多遊客….原來Ｄ燈打落去個神殿到都幾靚個喎。跟住入都去睇野o既時間就真係人山人海咁，好似新年行年宵市場，根本上每一個地方都係人，重有就係原來Ｄ外國遊客好鍾意係夜晚先去睇，因為無咁晒同埋熱……其實見到咁多人都無咩心機睇，都係搵Ｄ靚o既位影下相，全程都無聽過個導遊講解。睇完都成六點半，就回程返隻遊船到食晚餐喇。個晚餐都無咩大驚喜，多o左Ｄ牛同雞，不過味道就一般啦。食完飯就返房休息啦….
—->相簿
2007埃及之旅第三天
28 Oct 2007
洪加達 Hurghada
住宿 : Le Meridien Makadi Bay Resort
今日係行程o既第三日，會比較悠閒，今日o既節目就係係紅海到玩浮潛，玩浮潛係沙巴到都試過。食o左早餐之後就出發去目的地，都要離酒店有成個鐘o既路程先到。到達目的地後就囉o左Ｄ浮潛用品，跟住就上船出發紅海浮潛之旅….呀，呢到個沙灘都幾靚架，Ｄ水又真係好清，淨係見到藍色同綠色o既水，好正……又碼頭出發去到玩浮潛o既地方都要成半個鐘，途中都見都唔少o既船向住差不多方向出發。到達o左玩浮潛目的地後每人就囉浮潛o既用具，然後講解下Ｄ用具點用就開始落水喇 ! 初初玩時唔係幾記得點呼吸，點解吸極都入水o既，原來個用具就壞o左….之後換o左個新o既就唔同喇，呢到一帶都叫做多珊瑚，但係唔係多，魚o既種類都幾多下。來旅行前已經準備好浮潛影相o既保護袋，都係水底影唔少相，但係影o既時候唔記得將鏡頭同個袋o既距離整好所以有Ｄ相影到變o左形。玩到差不多中午係返上船食Lunch ，話時話呢個Lunch都幾好味 !! 食完 Lunch 之後架船就駛去另外一個地方在玩過，不過就無咁多珊瑚同埋淨係得一兩隻品種o既魚見到，重有就係得我同另外一個男仔繼續玩，其餘都係晒船到休息，有Ｄ團友重唔舒服添…..玩到差不多之後就返船回程返酒店….返到酒店就整理一下就去食晚餐。
—->相簿
2007 埃及之旅第二天
27 Oct 2007
開羅 Cario ->洪加達 Hurghada
住宿 : Le Meridien Makadi Bay Resort
今日係行程o既第二日，因為個領隊話我地會同個單張入面o既行程倒轉來玩，所以會去o左洪加達先。晨早起身開個窗睇下出面環境，原來埃及o既空氣污染都幾勁下，望落去一篇白蒙蒙o既感覺，整理好後就去食早餐，早餐又係OK啦…唔會食唔飽 !之後就要開始長達六個鐘o既車程啦，開頭食飽o左，上車無耐就訓o左。但係後來，架車無神好似轆到野咁，司機就停就路邊睇下發生咩事啦。原來架車用緊o既係翻倒軚，唔知係唔係長時間高速行駛，條翻倒軚爛o左，司機大佬即刻就要換軚，重有同行o既伴遊(唔記得講埃及Ｄ旅行團通常都有個當地接待旅行社o既伴遊跟住成個行程，呢個伴遊叫慕罕物德)，佢地兩個係到換軚o既時間，我地就趁機落車影相，影影下見到對面線有幾架軍警開路(軍警開路每日只有兩次，一班通常係三點幾，一班就係八、九點到，需要軍警開路o既地區通常係又洪加達<->樂蜀或者亞斯旺<->亞布辛布神殿呢兩程，因為路程要經過沙漠高速公路，不久前就發生過有旅行車比炸事件，所以埃及政府要保護遊客安全而做)。之後一路上都睇下原路風景，見到有好多風力發電o既風車，範圍都幾大下，係Ｄ近海o既地方又見到有Ｄ鑽探油田o既地方。之後就到o左一個中途站到方便下喇，係埃及去廁所每次都係要俾錢，男o既唔俾通常唔會問，但係女o既唔俾係唔俾入廁所方便…..等車途中都耐唔耐吹起一陣陣風沙，之後都等o左幾耐，原來架車係去補返先前爆o左條軚，攪掂晒之後就繼續起程。但係行o左大約個幾鐘之後又爆多一次，因為今次無士啤軚，所以亞伴遊唯有Call 架車來車我地去o左洪加達食Lunch o既地方先，不過就要歡樂滿東華喇……去到洪加達間食肆都成14:30 喇，本來就係酒店到 Settle o左先去玩沙漠四驅車，但係因為時間太晏，所以就要直接去個個地方喇。今次就揀o左玩沙漠四驅車，費事玩到成身都係塵。座住架四驅車入去，開頭以為會行高行低，點知原來係係一片乾燥o既泥土上行走，一Ｄ都唔激….失望….入到個Camp Site 入面已經有不少o既遊客係到，個Camp Site 入面有幾排屋，入面住o左Ｄ遊牧民族，重有得騎駱駝，跟住試下Ｄ埃及茶、埃及水煙(有好多隻味)，同埋睇下Ｄ麵包點整，最後就係食下佢地整o既晚餐，不過無咩食到，因為食完個Lunch無耐，唔係好肚餓。食完野，個 Camp Site 就攪下野火會，叫Ｄ人出去跳下舞咁，不過我地無人出去…嘻嘻 ! 跟住就係回程，回程途中會停低睇下滿天星，不過個晚就唔係好多，可能係因為向住市中心方向比較光Ｄ，唔係想像中咁多囉 ! 玩完晒就返酒店，間酒店就話係5星級，就非常之大，我其實都唔知有幾大，睇返佢地個Website先知，不過我地住個到就好似員工宿舍隔離，離開個Main Block 都要成10-15分鐘路程。但係睇佢地個 Website 入面Ｄ房到幾靚架喎…同我地住o既簡直就好大分別。分好房之後就整理一下，然後去食晚餐，晚餐都叫做多野食，但係就係無野飲，齋食……食野途中見到兩位團友，佢地無參加沙漠四驅車呢個節目，所以就係酒店到，但係佢地靜靜雞話我地知佢地係酒店到玩o左四驅車，比我地平成一半(~US$20)….食完野就返屋沖涼訓覺….又完成一日o既旅程喇…..
—->相簿
2007 埃及之旅第一天
25-26 Oct 2007
香港 Hong Kong -> 杜拜 Dubai -> 埃及 首都 開羅 Cario
住宿 : Cario Zoser Hotel
第一日係25/10/2007夜晚係香港機場集合，因為今次係搭乘阿聯酋航空公司，所以Check-in 嘅地方o係係機場2號客運大樓。去到個機場2號客運大樓都幾大下，不過就得3間航空公司Counter。做完 Check-in 之後，因為都有Ｄ時間淨，所以就行下個客運大樓，入面都有幾多商舖，食肆都唔少，價錢就平過1號客運大樓Ｄ舖頭。不過因為都幾夜下，好多商舖都閂晒門，係入面揀o左間茶餐廳食野，個名叫阿瑪港澳門餐廳，入面有主要係食台灣式食品，叫o左個招牌五香牛肉麵，重有一個豬軟骨麵，個五香牛肉麵比較好味Ｄ，重送o左兩隻瑞士汁雞翼添，味道都唔錯。之後就行o左一陣睇下有咩商店，就行返去1號客運大樓到離境準備出發。搭完無人駕駛去到等上機o既地方都有唔少人，不過黑人比較多，阿聯酋o既航機感到上就同國泰無咩分別，不過Ｄ膳食就比較o若外國人多Ｄ。因為都成12點幾先起飛，所以上機無耐就訓o左，直到派餐先醒。去到杜拜係零晨o既4點鐘到，不過就係當地時間o既兩點鐘到，因為慢兩個鐘到，要等成4個鐘到先再搭飛機去開羅，期間因為轉機有4個鐘的話，就可以去食下機場入面o既餐廳免費食野。之後到o左開羅就係中午o既時間，去到開羅個入境大堂要攪成半個鐘先出到境，但係就見到Ｄ外國人唔洗排隊就咁就可以出境，唔知做o左Ｄ咩手續呢 ?? 期間就係Ｄ找換店到換o左Ｄ埃鎊。出o左境去到架旅遊巴到，今次因為得11個人，所以只得一部24座，重要將Ｄ行李放係車頂上面，都幾牙煙下，因為Ｄo急都幾重下架嗎 ! 之後第一站行程就係去食野，其實都唔肚餓，不過已經係當地o既1點幾鐘喇。餐廳入面o既食物就不過不失啦，不過飲品就欠奉啦，但係領隊就安排o左每檯一支，都叫做幾好，其他飲品好似汽水都要圍返港幣成十幾蚊一罐。
食完野，第一個景點就係開羅博物館喇，入面基本上存放o左係Ｄ金字塔入面搵到o既野，包括木乃伊同埋Ｄ陪葬品，入面就唔比影相，所以都無得拍照留念。我地重自費睇o左個木乃伊博物館，因為無包到，價錢係埃鎊L.E.$100一個人，入面放o左幾個法老王o既木乃伊，有拉美西斯二世、圖塔摩斯2-4世，重有近期証實身份o既 Hatshepsut女皇等。之後就睇埋個動物木乃伊館，呢個就唔洗收錢o既….睇完晒所有o既野之後就去睇清真寺，基本上個到係一個市集，都幾多人去睇野，不過Ｄ野唔係咁吸引，所以行o左一個圈就搵地方座低休息下。之後就去食個晚餐，個晚餐都幾OK，款式都係個幾味，又係以沙律為主。食飽飯就返酒店，間酒店叫做 Zoser Hotel ，位於吉薩區，基本上無咩特別，執好晒野就訓，咁就完成o左第一日o既行程喇。
—->相簿
