2008 紐西蘭北島遊記第五日

Day 5 - 31-10 -2008

 

Wellington City Visit à National War Memorial à Wellington Botanic Gardens (1)à Wellington Cable Car Museum à Rose Gardens à Halswell Lodge à Wellington City Visit à Queen Wharf à Museum of Wellington City & Sea

 

住宿 : Halswell Lodge

 

今日嘅行程係係 Wellington 嘅市內觀光，我哋第一站就係去一個路經嘅景點 National War Memorial

National War Memorial，睇落去真係唔知咩來

 

其實呢個係一個紀念一係戰爭時死咗嘅紐西蘭人，不過唔知點解放咗係間大學嘅入口到嘅呢 ?! 跟住我哋就去 Wellington Botanic Gardens 參觀，呢一個其實係一個市鎮公園，而位置就位於 Mt. Victoria，有 Cable Car可以搭上去個公園最高個個位，有似香港嘅太平山嘅纜車。

Tree House

 

不過我哋去到個日啱啱就定期維修，所以就無得搭喇 ! 係個公園個頂到重有 Tree House 同埋Wellington Cable Car Museum ，呢個 Museum 主要係介紹一下 Wellington 嘅纜車係點樣出現，最初係有錢人用來運載一物件往返屋企而出現，後來就開始普及化啦 ! 不過我哋係 Wellington 市入面都有見到有Ｄ屋起係個山到，又有架私人纜車用添呀 !

 

Cable Car Museum

公園裡面一大片草地

 

之後我哋就去咗係公園入面個個Rose Gardens，個Rose Gardens入面都幾多人，因為有間 Café 係入面，但係我哋去個日都無咩花開到~~~應該係未係放花嘅日子，如果成個Rose GardensＤ玫瑰開晒的話應該會好靚 !

Rose Garden

 

睇完個Rose Gardens我哋就揸返去個 Lodge 到泊低架車，因為我哋下一站就係係個市中心到睇下嘢，不過尋日已經發覺個市中心無咩地方可以泊車 ! 其實呢個 Wellington 真係無咩特別嘢睇，商場有無~~~連食嘢嘅地方都唔多 ! 點解係首都來嘅呢 ?! 我哋行行下見到有壽司又買咗幾件來食，呢到Ｄ壽司都係咁嘅味道~~即係無咩醋味 !

無咩醋味嘅壽司

 

但係就平過先前嘅市鎮囉 ! 然後行多一陣就要搵食 Lunch 嘅地方啦~~~無咩地方可以選擇之下就揀咗去食 Burger King

Wellington 市中心

係條街到都有Ｄ藝術品放咗係到

Burger King Set

 

食完Lunch就去咗個 Queen Wharf 同埋個 Museum of Wellington City & Sea，呢個Queen Wharf 其實係一個碼頭加咗Ｄ食店係入面，同埋俾人休閒下嘅地方~~~好天嘅時候係到 Hae下都應該幾正~~~

 

Queen Wharf ，係一個休憩嘅地方

至於個Museum of Wellington City & Sea就係講返一Ｄ Wellington 嘅歷史同埋一Ｄ航海嘅嘢，入面重播放咗一個海難嘅資料~~~個次嘅海難都死咗唔少人 !

係個 Museum 入面Ｄ展品都幾靚

睇完就要搵下今晚晚餐嘅地方，但係都係無著落 ! 於是都係去超市都買Ｄ海鮮做今晚嘅晚餐啦~~~~~

自家製晚餐

2008 紐西蘭北島遊記第四日

Day 4 - 30-10 -2008 

Wanganui à Paraparaumu à Porirua à Wellington à Porirua à Wellington

住宿 : Halswell Lodge

今日比前兩日早咗一個鐘起身出發，因為要驅車前往Wellington，但係尋晚好似打風咁，非常之噪 ! 我哋大約8點鐘到攪掂晒所有行裝就去食間 Motel 準備嘅早餐，呢個早餐係紐西蘭傳統嘅早餐，即係麥皮加奶囉 !

Motel 嘅傳統早餐

食嘢期間見到一團人係到食嘢，不過係外國旅行團。食完早餐大約9點鐘到就出發去 Wellington，車程就係大約2小時45分到 ! 係途中入過下油咁，今日天氣非常之睛朗，所以晒到雙手到幾熱下，行行下有個 Shopping Mall，於是就停車入去睇下

呢個Shopping Mall 都叫做幾大下

食咗幾件壽司

呢個地區係叫 Paraparaumu ，呢個Shopping Mall 其實都幾大下，又行下Ｄ Supermarket ，我哋重係入面食咗幾件壽司，味道都係咁上下….都係香港Ｄ好味Ｄ ! 之後重係入面買咗條牛仔褲添呀~~~睇完呢個 Shopping Mall 就繼續向 Wellington 出發，途經一個城市叫 Porirua ，入面又有一個Shopping Mall (咩咁多 Shopping Mall架 ?!) 其實時間都唔早，所以順便係入面搵個地方食個 Lunch ，呢個 Shopping Mall 其實都無咩嘢睇，因為係紐西蘭好多嘢都係差不多一樣，唔會話有Ｄ咩地方有嘅嘢其他地方係無嘅 ! 雖然係咁，但係我哋重係入面買咗Ｄ嘢添呀 ! 而個Lunch 我哋就係入面個 Food Court 到攪掂，係紐西蘭嘅 Shopping Mall 入面嘅 Food Court 又係一模一樣，又係有Ｄ中國式食品(佢哋叫 Hong Kong Fastfood)、印度嘢、日本同埋一、兩間買包嘅…

豐富嘅午餐

食完個Lunch就繼續去 Wellington ，我哋大約2點幾到達Wellington，就去搵下今晚住宿嘅地方喇 ! 好在都幾容易搵到，但係都要兜一陣先搵到…之後就順便 Check in 埋喇 ! 呢間 Lodge 嘅房比較舊同埋係細間Ｄ，設備比起早兩嘅住宿無咁正，可能Wellington係叫做城市呱 !

Lodge

放好晒所有嘢之後就去兜下呢個 Wellington 嘅市中心，唔見有咩大名牌同埋大型商場。然後我哋就去咗 TePapa Museum 到參觀

TePapa Museum外觀

如果要泊係入面個停車場就俾錢，所以我哋將架車泊咗係附近一個New World超市嘅停車場，但係其實個車場有晒Ｄ警告，除咗係幫襯佢哋嘅顧客，其他一律不准停車係到，唔係就會拖你架車…不過我哋就唔理咁多啦 ! 然後就行去睇呢個 Museum 喇，呢個 Museum 係唔洗俾入場費架啱晒我哋喇 ! 入面主要都係介紹下紐西蘭嘅歷史同埋一Ｄ關於毛利族人嘅資料，又講下Ｄ海洋動物嘅嘢…之後我哋就兜咗去一個叫 Town Belt 嘅地方，呢個位置可以睇到成個 Wellington 市，但係上去嘅路就真係非常之斜囉。

係TownBelt望落去嘅 Wellington市

跟住就係要搵下今晚要食嘅嘢喇…睇來係 Wellington 市中心都係無咩好食，於是又係要自己整嘢食啦~~~因為係 Wellington 淨係見到得一間超市，所以就決定驅車去先前去過 Porirua 個三間超市到買嘢，覺得會多Ｄ嘢買，點知原來係無咩嘢買嘅，等我哋重專登揸車去買嘢添 ! 最後我哋到係去返 Wellington 個間New World 超市到買嘢，今晚嘅晚餐係西冷扒加帶子同埋雞串蝦串黃蕉，但係唔知係唔係間 Lodge 個廚房嘅抽氣唔得，攪到成身都係油煙味~~~要洗衫呢 !

 

是日晚餐

2008 紐西蘭北島遊記第三日

Day 3 (29-10 -2008)

National Park Village à Wanganui à Durie Hill Elevator à Durie Hill Memorial Tower à Shopping Center  à Alma Motel & STONZE Restaurant, Cafe & Bar à Wanganui City Visit à Warehouse à Alma Motel & STONZE Restaurant, Cafe & Bar

住宿 : Alma Motel & STONZE Restaurant, Cafe & Bar

今日整完晒所有行裝之後，就去整返個美味嘅早餐食下先，來咗幾日都無食過熱嘅早餐喇 ! 個早餐係炒蛋煙三文魚再加麵包。

美味嘅自製早餐

 

出到去整早餐嘅時候，都見都幾多宿友係到整早餐食 ! 食完早餐就出發去 Wanganui ，點解去呢個城市呢 ?! 因為呢一個係一個中途站，原先睇由National Park Village 去 Wellington 個車程都幾耐下，所以就係中間揀一個城市駁下腳。不過今日係好大霧同埋有Ｄ霧雨，所以車速都唔可以開得太快。

出面好大霧呀!!!

 

去呢個 Wanganui 嘅路程大部份都係行山路，又好多彎，好似係大霧山揸緊車咁 ! 到咗呢個Wanganui 之後個天氣又轉返好好多，不過都幾多烏雲同埋幾大風下 ! 呢一城市其實都幾近岸邊，係城市嘅中間俾一條大河道分開兩邊，另外就係好大風，係吹得郁人個種 ! 去到呢個 Wanganui 大約係十二點到，首先就係搵下間 Motel 嘅位置，之後就去呢個市嘅市中心到食飯個午餐。

不過見時間尚早，於是就係呢個市到兜下，兜兜下去咗呢個市嘅一個景點，個到有一部好古老嘅升降機叫做Durie Hill Elevator，本來想搭下，但係就要俾錢搭，所以就無試到。

 

呢個就係個部 Durie Hill Elevator…入面有部 Lift 係到架 !

係個Durie Hill Elevator 個頂到影又係大風到呢…可以起飛…

 

呢部升降機係係1919年興建嘅，重要係一部公共嘅升降機來個喎 ! 呢一架升降機其實係連住一條隧道，叫做Durie Hill pedestrian tunnel，之後就會去到一條叫 City Bridge 嘅橋，一路行就會去返市中心。不過我哋無去行呢條隧道，因為要落返去先得，同埋發覺係紐西蘭泊車好多地方都要俾錢架…..! 之後就上咗係附近嘅 Durie Hill Memorial Tower，呢個 Durie Hill Memorial Tower 有33.5m 高，總共有191級，係個頂上面可以睇到附近嘅景點。但係我哋上到去，只係覺得好大風，如果有一對翼的話，就可以飛上天 !

Durie Hill Memorial Tower

睇完呢個景點之後，我哋就去咗市中心嘅一個 Shopping Center 到食 Lunch，食咗個 McDonald 餐同埋一間叫 Milkshake 嘅餐，嘩~~~個 McDonald 餐要成五十蚊港幣咁濟 ! 真係幾貴下 !

食完就去 Motel 到Check in，然後就去咗市中心到行街，行行下重買咗兩支蜜糖添呀 ! 本來想係附近到睇下有咩嘢睇，但係如果要睇就要去好遠下，返到香港搵返Ｄ資料原來呢個市附近有Ｄ嘢睇下個喎 !

市中心景色

然後我哋就去 Countdown 同埋 Warehouse 嘅超市到買今晚嘅晚餐，今晚係食西冷加Ｄ蔬菜。

 

間Motel房其實都幾大間，重有Ｄ簡單嘅廚具，不過就無風筒同埋大門同廁所係用玻璃，感覺上覺得會有人望入來咁 ! 重有就係呢間 Motel 本身有一間餐廳，係食石頭燒嘅….

Motel外觀

都幾多人幫襯咁，重有就係呢到可以免費上網架…總括來講都唔錯。

 

自家製 Dinner….