2007 埃及之旅第五天

30 Oct 2007

尼羅河遊船悠閒的一天

住宿 : M/S Princess Amira

今日係無行程o既一日，朝早食完早餐之後就係舺板到Hae、睇下岸邊Ｄ風景。而架船就一路係尼羅河到行駛，行行下去到有個大水閘o既地方停o左，原來要排隊等過大水閘，跟住就見到好多埃及人拐架艇過來賣Ｄ衫、檯布之類o既野。點賣呢，佢地會用個袋包住Ｄ野拋上架船到，係拋上來，過程好鬼過癮。開頭淨係得Ｄ外國人買，我地同埋Ｄ團友就係到睇，後來我地有Ｄ團友又睇埋一份，攪攪下有成三、四架艇埋o左來，係咁拋Ｄ野上來。佢地賣Ｄ野開個價開頭好鬼死貴，我地要不斷還價，好在係網上面睇過知道佢地會開天剎價，我地還價，佢地重要表情多多，扮到好似好慘，泄晒底咁。睇睇下睇o岩o左條絲巾，梗係講下價先啦。開頭佢地要100埃鎊，我地開10埃鎊，跟住佢地就話唔得，扮到好慘….我地就15…20兩條…咁講…之後佢都係話唔得…我地咪掉返落去俾佢囉，一掉佢地就話得，咁就成交o左，過程都幾好玩，掉來掉去。其他團友都買o左唔少野，買完野都差不多到食飯時間。於是乎就去食返個Lunch，食完lunch係房到Hae o左一陣，跟住係睇架船過水霸。見有Ｄ時間，就上o左岸係岸邊一間舖頭到睇野，係間舖頭到買o左Ｄ書籤同埋一幅尼羅河旅遊地圖，重食o左支雪條添…..正。之後都唔敢行咁遠，費時返唔到船就大鑊….跟住又係返房到休息等食晚飯，點知訓o左一陣….到o左食飯時間就上返去間餐廳到，不過就多o左好多外國人係到，應該係頭先泊岸時先上船，今晚o既晚餐都係無咩驚喜，普普通通咁，點知我地食完想走o既時間，見到個侍應揸住個類似蛋糕o既物體差不多繞場一週，俾每一檯o既旅客都睇一睇，又唔知講Ｄ咩，最後行到我地就放低o左…原來係領隊為我地慶祝生日，真係一個大驚喜…嘻嘻..個蛋糕雖然甜o左Ｄ，但係都幾好味。食完個蛋糕就返房訓喇….咁就渡過o左一個愉快o既生日喇…

—->相簿

2007 埃及之旅第四天

29 Oct 2007

洪加達 Hurghada (軍警開路) —> 樂蜀 Luxor —> 恩斯納 Esna  —> 喀納克神殿 Karnak Temple —> 帝王谷 Valley of Kings —> 女皇神殿 Hatshepsut Temple —> 萬農神殿 Colossi of Memnon —> 樂蜀神殿 Luxor Temple

住宿 : M/S Princess Amira

今日要一早就起身，因為要由洪加達去樂蜀，途中要經過沙漠高速公路，所以要軍警開路。我地要係8:00係一個地方集合，然後一軍警就會浩浩蕩蕩咁帶住成隊人駛去目的地。去到集合o既地方都已經有幾十部大細旅遊車係到排隊準備出發，到o左出發時都有成起碼五、六十部車到…..之後去到第一景點 – 喀納克神殿(Karnak Temple http://www.eyelid.co.uk/karnak1.htm, http://en.wikipedia.org/wiki/Karnak)

都成十一點，陽光開始好猛烈。入面Ｄ建築有好大部份都已經係爛o左，但係都睇到埃及當時建築係….點解可以起到Ｄ咁o既o野o既???重有就係每個建築物上面Ｄ雕刻都好細緻，重要係好對稱，埃及古代唔通真係有外星人 !!! 睇完呢個神殿之後就係上尼羅河遊船，隻船其實都唔係靚仔，因為睇到地個Ｄ都幾正下….今次係住係四樓，但係就係船尾，如果架船係開住的話都幾噪同埋都會有Ｄ死氣味添架….安頓好Ｄ行李就係船入面到食 Lunch ，入面Ｄ野食可以講句，食得飽唔會餓囉 !

食完午餐，係船到四圍睇下，然後休息下又去另外一個景點，帝王谷。呢到有不少o既埃及法老王o既墓穴，但係公開俾公眾人士參觀o既唔係有好多個，重有就係跟團的話通常都係會帶你睇幾個比較出名，不過其實入面無咩野睇，主要o既野都搬晒去埃及博物館入面，所以係無野睇o既 ! 呢個時間係呢Ｄ咁空曠o既地方睇野都唔好話唔晒，所以睇兩睇就走，重要入面又唔比人影相，所以睇完就算喇。

睇完帝王谷，然後就去女皇神殿，呢個女皇哈特謝普蘇特(Hatshepsut)係埃及唯一一個女o既法老王，其實係佢死o左之後，新上位o既法老王係唔想後世人知道有一個咁o既女法老王，所以有關佢o既野好多都被破壞，但係唔知咩原因，呢個神殿就遺留o左落來 ! 呢個神殿入面Ｄ建築比起其他o既就比較簡單，不過入面就出現o左Ｄ牛神o既壁畫，其餘都係無咩大特別。

跟住另外一個景點就係去樂蜀神殿 (Luxor Temple)，呢次我地搭o左Ｄ埃及水上的士過對面岸o既神殿，去到都成五點幾，不過個天到黑晒，重有就係好多遊客….原來Ｄ燈打落去個神殿到都幾靚個喎。跟住入都去睇野o既時間就真係人山人海咁，好似新年行年宵市場，根本上每一個地方都係人，重有就係原來Ｄ外國遊客好鍾意係夜晚先去睇，因為無咁晒同埋熱……其實見到咁多人都無咩心機睇，都係搵Ｄ靚o既位影下相，全程都無聽過個導遊講解。睇完都成六點半，就回程返隻遊船到食晚餐喇。個晚餐都無咩大驚喜，多o左Ｄ牛同雞，不過味道就一般啦。食完飯就返房休息啦….

 

—->相簿

2007埃及之旅第三天

28 Oct 2007

洪加達 Hurghada

住宿 : Le Meridien Makadi Bay Resort 

今日係行程o既第三日，會比較悠閒，今日o既節目就係係紅海到玩浮潛，玩浮潛係沙巴到都試過。食o左早餐之後就出發去目的地，都要離酒店有成個鐘o既路程先到。到達目的地後就囉o左Ｄ浮潛用品，跟住就上船出發紅海浮潛之旅….呀，呢到個沙灘都幾靚架，Ｄ水又真係好清，淨係見到藍色同綠色o既水，好正……又碼頭出發去到玩浮潛o既地方都要成半個鐘，途中都見都唔少o既船向住差不多方向出發。到達o左玩浮潛目的地後每人就囉浮潛o既用具，然後講解下Ｄ用具點用就開始落水喇 ! 初初玩時唔係幾記得點呼吸，點解吸極都入水o既，原來個用具就壞o左….之後換o左個新o既就唔同喇，呢到一帶都叫做多珊瑚，但係唔係多，魚o既種類都幾多下。來旅行前已經準備好浮潛影相o既保護袋，都係水底影唔少相，但係影o既時候唔記得將鏡頭同個袋o既距離整好所以有Ｄ相影到變o左形。玩到差不多中午係返上船食Lunch ，話時話呢個Lunch都幾好味 !!  食完 Lunch 之後架船就駛去另外一個地方在玩過，不過就無咁多珊瑚同埋淨係得一兩隻品種o既魚見到，重有就係得我同另外一個男仔繼續玩，其餘都係晒船到休息，有Ｄ團友重唔舒服添…..玩到差不多之後就返船回程返酒店….返到酒店就整理一下就去食晚餐。

—->相簿

2007 埃及之旅第二天

27 Oct 2007

開羅 Cario ->洪加達 Hurghada

住宿 : Le Meridien Makadi Bay Resort 

今日係行程o既第二日，因為個領隊話我地會同個單張入面o既行程倒轉來玩，所以會去o左洪加達先。晨早起身開個窗睇下出面環境，原來埃及o既空氣污染都幾勁下，望落去一篇白蒙蒙o既感覺，整理好後就去食早餐，早餐又係OK啦…唔會食唔飽 !之後就要開始長達六個鐘o既車程啦，開頭食飽o左，上車無耐就訓o左。但係後來，架車無神好似轆到野咁，司機就停就路邊睇下發生咩事啦。原來架車用緊o既係翻倒軚，唔知係唔係長時間高速行駛，條翻倒軚爛o左，司機大佬即刻就要換軚，重有同行o既伴遊(唔記得講埃及Ｄ旅行團通常都有個當地接待旅行社o既伴遊跟住成個行程，呢個伴遊叫慕罕物德)，佢地兩個係到換軚o既時間，我地就趁機落車影相，影影下見到對面線有幾架軍警開路(軍警開路每日只有兩次，一班通常係三點幾，一班就係八、九點到，需要軍警開路o既地區通常係又洪加達<->樂蜀或者亞斯旺<->亞布辛布神殿呢兩程，因為路程要經過沙漠高速公路，不久前就發生過有旅行車比炸事件，所以埃及政府要保護遊客安全而做)。之後一路上都睇下原路風景，見到有好多風力發電o既風車，範圍都幾大下，係Ｄ近海o既地方又見到有Ｄ鑽探油田o既地方。之後就到o左一個中途站到方便下喇，係埃及去廁所每次都係要俾錢，男o既唔俾通常唔會問，但係女o既唔俾係唔俾入廁所方便…..等車途中都耐唔耐吹起一陣陣風沙，之後都等o左幾耐，原來架車係去補返先前爆o左條軚，攪掂晒之後就繼續起程。但係行o左大約個幾鐘之後又爆多一次，因為今次無士啤軚，所以亞伴遊唯有Call 架車來車我地去o左洪加達食Lunch o既地方先，不過就要歡樂滿東華喇……去到洪加達間食肆都成14:30 喇，本來就係酒店到 Settle o左先去玩沙漠四驅車，但係因為時間太晏，所以就要直接去個個地方喇。今次就揀o左玩沙漠四驅車，費事玩到成身都係塵。座住架四驅車入去，開頭以為會行高行低，點知原來係係一片乾燥o既泥土上行走，一Ｄ都唔激….失望….入到個Camp Site 入面已經有不少o既遊客係到，個Camp Site 入面有幾排屋，入面住o左Ｄ遊牧民族，重有得騎駱駝，跟住試下Ｄ埃及茶、埃及水煙(有好多隻味)，同埋睇下Ｄ麵包點整，最後就係食下佢地整o既晚餐，不過無咩食到，因為食完個Lunch無耐，唔係好肚餓。食完野，個 Camp Site 就攪下野火會，叫Ｄ人出去跳下舞咁，不過我地無人出去…嘻嘻 ! 跟住就係回程，回程途中會停低睇下滿天星，不過個晚就唔係好多，可能係因為向住市中心方向比較光Ｄ，唔係想像中咁多囉 ! 玩完晒就返酒店，間酒店就話係5星級，就非常之大，我其實都唔知有幾大，睇返佢地個Website先知，不過我地住個到就好似員工宿舍隔離，離開個Main Block 都要成10-15分鐘路程。但係睇佢地個 Website 入面Ｄ房到幾靚架喎…同我地住o既簡直就好大分別。分好房之後就整理一下，然後去食晚餐，晚餐都叫做多野食，但係就係無野飲，齋食……食野途中見到兩位團友，佢地無參加沙漠四驅車呢個節目，所以就係酒店到，但係佢地靜靜雞話我地知佢地係酒店到玩o左四驅車，比我地平成一半(~US$20)….食完野就返屋沖涼訓覺….又完成一日o既旅程喇…..

—->相簿

2007 埃及之旅第一天

25-26 Oct 2007

香港 Hong Kong -> 杜拜 Dubai -> 埃及 首都 開羅 Cario

住宿 : Cario Zoser Hotel

第一日係25/10/2007夜晚係香港機場集合，因為今次係搭乘阿聯酋航空公司，所以Check-in 嘅地方o係係機場2號客運大樓。去到個機場2號客運大樓都幾大下，不過就得3間航空公司Counter。做完 Check-in 之後，因為都有Ｄ時間淨，所以就行下個客運大樓，入面都有幾多商舖，食肆都唔少，價錢就平過1號客運大樓Ｄ舖頭。不過因為都幾夜下，好多商舖都閂晒門，係入面揀o左間茶餐廳食野，個名叫阿瑪港澳門餐廳，入面有主要係食台灣式食品，叫o左個招牌五香牛肉麵，重有一個豬軟骨麵，個五香牛肉麵比較好味Ｄ，重送o左兩隻瑞士汁雞翼添，味道都唔錯。之後就行o左一陣睇下有咩商店，就行返去1號客運大樓到離境準備出發。搭完無人駕駛去到等上機o既地方都有唔少人，不過黑人比較多，阿聯酋o既航機感到上就同國泰無咩分別，不過Ｄ膳食就比較o若外國人多Ｄ。因為都成12點幾先起飛，所以上機無耐就訓o左，直到派餐先醒。去到杜拜係零晨o既4點鐘到，不過就係當地時間o既兩點鐘到，因為慢兩個鐘到，要等成4個鐘到先再搭飛機去開羅，期間因為轉機有4個鐘的話，就可以去食下機場入面o既餐廳免費食野。之後到o左開羅就係中午o既時間，去到開羅個入境大堂要攪成半個鐘先出到境，但係就見到Ｄ外國人唔洗排隊就咁就可以出境，唔知做o左Ｄ咩手續呢 ?? 期間就係Ｄ找換店到換o左Ｄ埃鎊。出o左境去到架旅遊巴到，今次因為得11個人，所以只得一部24座，重要將Ｄ行李放係車頂上面，都幾牙煙下，因為Ｄo急都幾重下架嗎 ! 之後第一站行程就係去食野，其實都唔肚餓，不過已經係當地o既1點幾鐘喇。餐廳入面o既食物就不過不失啦，不過飲品就欠奉啦，但係領隊就安排o左每檯一支，都叫做幾好，其他飲品好似汽水都要圍返港幣成十幾蚊一罐。

食完野，第一個景點就係開羅博物館喇，入面基本上存放o左係Ｄ金字塔入面搵到o既野，包括木乃伊同埋Ｄ陪葬品，入面就唔比影相，所以都無得拍照留念。我地重自費睇o左個木乃伊博物館，因為無包到，價錢係埃鎊L.E.$100一個人，入面放o左幾個法老王o既木乃伊，有拉美西斯二世、圖塔摩斯2-4世，重有近期証實身份o既 Hatshepsut女皇等。之後就睇埋個動物木乃伊館，呢個就唔洗收錢o既….睇完晒所有o既野之後就去睇清真寺，基本上個到係一個市集，都幾多人去睇野，不過Ｄ野唔係咁吸引，所以行o左一個圈就搵地方座低休息下。之後就去食個晚餐，個晚餐都幾OK，款式都係個幾味，又係以沙律為主。食飽飯就返酒店，間酒店叫做 Zoser Hotel ，位於吉薩區，基本上無咩特別，執好晒野就訓，咁就完成o左第一日o既行程喇。

—->相簿

 

年宵市場

新年前去行年宵市場，日頭行真係無咁多人

行晒成個場都係半個鐘內攪掂 !

如果係係夜晚行…無4個鐘到行唔晒 !

今年Ｄ野都無野特別，所以無買到野 !

重要加上落雨就更加無咩癮….

西田內的食店

西田上年裝修完都無去過，今日得閒順便睇下有無Ｄ野啱買係新年用!成個商場好似新咁。最出色就係多咗幾間食店，全部都係小食咁，可以食到好飽又可以唔食好飽樣樣試下!我地就樣樣試下，食咗間迴轉壽司、日式魚蛋同埋一個有日式炒麵大雜錦。幾間野嘅味道都唔錯，可以再試  !

今日亞Sir請食飯 !!

今日我個上司請我地食飯，地點就係係Time Square入面間”鍾菜”。其實呢間係稻香集團嘅酒家，但係佢就集中菜同西餐於一身。我地個上司點咗一人一個套餐，全部總共有5道菜連餐飲同甜品。基本上都幾好味，不過份量就少Ｄ，最後要叫多個炒飯先夠食 !

2007澳門橫琴二天遊第二日

2007年11月10日

行程 :  星際酒店 -> 澳門威尼斯人渡假村 ->珠海橫琴(橫琴蠔生態園) -> 澳門威尼斯人渡假村 -> 皇冠酒店 -> 關閘 -> 新益美食 -> 香港

今日o既行程去橫琴食蠔，基本上係唔洗用車錢就可以去到橫琴蠔自然生態園 ! 因為有酒店o既車會去路氹關口，然後橫琴蠔生態園就有車送去佢地個生態園。我地跟住原來o既計劃就去到橫琴蠔生態園，不過先前打極電話去個間野到一路都唔通，好在有另外一班人先前約o左佢地 ! 如果唔係就有機會去唔成啦 ! 去到o既時候好多人，有Ｄ係旅行團又有Ｄ係自己去o既澳門人，坐低o左好耐先有人落單寫餸。寫完又等o左好耐先上餸，總之就係等o左好耐….叫o左鐵板薑荵蠔、炭燒生蠔、芝士焗生蠔同埋一碟山水豆腐 ! Ｄ薑荵炒蠔得個幾隻(我地叫o左一斤)，食兩三下就無o左..最好食就係炭燒生蠔，其他都好一般 ! 算係到此一遊 ! 走o既時候架車又鬼死咁耐先到 ! 之後我地就由路氹關口過返關返澳門，諗住搭車去周潤發酒店 (皇冠酒店) 睇下…點鬼知個架車個司機同人地傾計唔知去o左邊 ! 人地威尼斯人開成4~5架佢地一架都未開….咁我地唯有搭威尼斯人架車再轉車去皇冠酒店啦 ! 去到間酒店唔係想像中咁….好多地方都重裝修緊。行o左一陣我地就搭酒店架車去拱北關閘，然後行去今晚食晚餐o既地方”新益美食”，去到都係o岩o岩開門 ! 跟住我地就叫o左幾個招牌美食，有”左麟右李齊撈起”、”將冰山劈開”、”芝士牛油蒜蓉焗大頭蝦”同埋一個”燒風鱔”。全部餸都幾特別，不過Ｄ Wasibi 好勁，食到上晒腦 ! 食完我地就去最後一站，新葡京……去到就去睇下間幾出名o既 Buffet “自助山”…嘩~~排晒長龍，唔知係唔係真係有咁多野食o既呢 ? 下次有機會都要試下先….不過先前係網上面睇到Ｄ人話Ｄ質素無初初咁正，會唔會重有80呎長o既食物放係到呢 ? 跟住睇下個賭場，佢地o既經營模式都係好似舊時咁要放低個袋，入面個場好細 ! 去過威尼斯人就會覺得呢到唔係好正。最衰重要係要係入面有玩過先至可以搭佢地Ｄ車，都幾小家 ! 要攪到入返去囉場飛仔先至可以搭免費車 ! 之後就搭佢地架車去碼頭，咁就完成兩日一夜o既澳門之旅啦 !

2007澳門橫琴二天遊第一日

2007年11月9日

住宿 : 星際酒店

行程 : 香港->澳門 -> 澳門威尼斯人渡假村 -> 星際酒店

今日晨早9:15船過澳門，事隔一年澳門又起多o左好多酒店喇 ! 重有就係家陣去澳門真係好快，雙眼合埋無耐真話到。去到澳門第一個行程就係去威尼斯人渡假村，基本而家去澳門你要去o既地方附近有間酒店，就唔洗俾搭車錢。去到威尼斯人覺得呢間酒店都幾大，重有就係入面都幾多Function Room係到 ! 途經Starbucks就入去飲返杯野先。之後，第一站就係去賭場到玩玩，佢地聲稱係威尼斯式管理，應該係幾Free下，果然連男士都可以孭住Ｄ Backpack 入去，個賭場真係好大，重有我地最鍾意玩o既大細機，重要係$5注非常抵玩 ! 玩完就去入面參觀下，入面個商場都有不少名店開o左係到，睇下條運河，咦，不過無人唱歌o既 ! 之後就去o左個 Food Court 到食o左個 Lunch，跟住就返去住宿o既酒店，梁朝偉酒店…即係星際酒店。上年來o既時候，呢間酒店都未有 Package 買，Check-in 完入房。嘩，係30樓都幾高下(平時Ｄ Package 俾Ｄ通常都係係5-10樓，好少有咁高)，望出去個 View 都唔錯，重有間房個樓底都幾高，同埋間房都幾大下 ! 放低o左Ｄ野就落去個賭場到玩下，呢到部大細機要成$10注，無威尼斯人咁好玩，所以玩o左陣就返上房享受下間房 ! 之後諗過去新葡京o既自助山食 Buffet ，不過唔想行，所以係酒店入面食返個 Buffet 。星際酒店o既 Buffet 就選擇唔多，重有就係Ｄ侍應生Ｄ態度都幾差下 ! 食完個晚餐就返房訓喇 !